Kinumpirma ng Philippine Anti-Organized Crime Commission (PAOCC) na kabilang sa “muscle group” ng mga ilegal na Philippine Offshore Gaming Operators (POGO) ang mga kidnapper ng isang Chinese student.
Ang grupo ay binubuo ng mga retiradong tauhan ng militar na inupahan ng mga POGO para mangidnap, manakit, magbanta, at pumatay ng mga tao kapalit ng pera o mga kahilingan. Ang 14-anyos na biktima ay kinidnap noong Pebrero 20 matapos pumasok sa klase sa isang international school sa Taguig City.
Natagpuang patay ang driver ng pamilya ng estudyante ilang araw matapos ang insidente. Natagpuan ang biktima noong Pebrero 25 sa kahabaan ng Macapagal Boulevard sa Parañaque City.
Ang puganteng Chinese na si Wang Dan Yu alyas Bao Long ang nasa likod umano ng kidnapping. Itinanggi ng ina ng biktima ang pagkakasangkot ng kanilang pamilya sa POGO, at sinabing target ng mga suspek ang kanilang driver sa pagdukot.