Ang halalan ay hindi lamang isang proseso ng pagpili ng mga pinuno; ito ay isang pagpapahayag ng ating kalayaan bilang isang demokratikong bansa. Bawat isa sa atin ay may tungkuling bumoto nang may malayang kaisipan, walang takot, at walang pananakot mula kaninuman. Ang ating boto ay hindi lamang isang numero sa balota kundi isang tinig na nagpapahayag ng ating pagnanais para sa isang mas maunlad, mas makatarungan, at mas mapayapang lipunan.

Sa panahon ng eleksyon, maraming pwersa ang maaaring sumubok na impluwensyahan ang ating desisyon—mula sa mga pekeng balita hanggang sa panunuhol at pananakot. Ngunit sa kabila ng mga ito, tayo ay may kakayahang ipaglaban ang ating karapatan sa pamamagitan ng matalinong pagboto. Hindi natin dapat ipagbili ang ating boto, hindi natin dapat ipagpalit ang ating kinabukasan sa mga panandaliang benepisyo. Sa bawat balotang ating pinupunan, inilalagay natin ang ating tiwala sa mga kandidatong tunay na magsusulong ng kabutihang panlahat, hindi lamang ng kanilang pansariling interes.

Ang demokrasya ay nabubuhay sa pamamagitan ng aktibong pakikilahok ng mamamayan. Ang hindi pagboto ay pagsasawalang-bahala sa ating hinaharap. Ang hindi tamang pagboto ay pagwawalang-bahala sa ating kinabukasan. Kaya naman, mahalagang tayo mismo ay magsaliksik, magsuri, at pumili ng mga lider na may integridad, malasakit, at tunay na dedikasyon sa paglilingkod.

Huwag nating hayaan na ang ating kalayaan sa pagboto ay maging isang hungkag na karapatan. Gamitin natin ito nang may pananagutan. Tayo ay may kalayaang bumoto, kaya bumoto tayo para sa kalayaan—kalayaang maging bahagi ng pagbabago, kalayaang mamuhay sa isang bansang pinamumunuan ng tunay na lingkod-bayan, at kalayaang ipaglaban ang kinabukasan ng susunod na henerasyon.

Sa darating na halalan, magdesisyon tayo hindi batay sa pansariling kapakinabangan kundi batay sa kapakanan ng nakararami. Ang ating boto ay sandata ng ating kalayaan. Gamitin natin ito ng tama.(Latigo Reportorial Team)